18
Sun, Nov

مالیې وزارت د سترو مالیه ورکوونکو له ډلې، غوره مالیه ورکوونکي وستایل

Afghanistan
Typography

مالیې وزارت نن د غویې  میاشتې په ۱۱ مه نېټه د یوې غونډې په ترڅ کې د کابل په انټر کانټیننټال هوټل کې د سترو مالیه ورکوونکو له ډلې، غوره مالیه ورکوونکې وستایل.

 

د دې غونډې موخه د مالیه ورکوونکو د اطاعت پذیرۍ کچې لوړول، د مالیه ورکونې کلتور دودول، د عوایدو ټاکل شوي موخې ته رسېدل، پانګونې ته هڅونه او په هېواد کې اقتصادي فعالیتونو ته پراختیا ورکول دي.
د اقتصاد وزیر ښاغلي عبدالستار مراد، د غونډې په پرانیسته وینا کې د دا ډول غونډو جوړولو ستاینه وکړه او ویې ویل، چې د مالیو ټولول د ملي عوایدو په زیاتوالي او د هېواد اقتصادي پراختیایې پروژو په ملاتړ کې رغنده رول لري، په دې اساس د اطاعت پذیرو مالیه ورکوونکو ستاینه کولی شي چې د مالیاتي عوایدو کچه لوړه کړي. نوموړي زیاته کړه اوس مهال په هېواد کې د ملي پروژو ملاتړ تر ډېره د مرسته کوونکو هېوادونو لخوا کېږي، د دا ډول غونډو په جوړولو سره کولی شو چې دولتي او خصوصي سکټورنه د پانګونې او مالیو منلو ته وهڅوو او په پایله کې خپلې ملي پروژې د هېواد له ملي عوایدو څخه تمویل کړو.
د مالیې وزارت د عوایدو او ګمرکونو معین ښاغلي شفیق احمد قاریزاده، وویل: مالیه وزارت په پام کې لري چې د سترو مالیه ورکوونکو د اطاعت پذیزۍ کچه لوړه کړي، د همدې لپاره یاد وزارت هغه ستر مالیه ورکوونکي چې د نورو په پرتله په مالیه منلو کې ښه ځلېدلي، ستایي.
نوموړي زیاته کړه، زمونږ هیله داده چې په را روانو کلونو کې د سترو مالیه ورکوونکو تر منځ سالمه سیالي را منځته کړو، په دې سره به د هېواد اقتصادي فعالیتونه معیاري او پراختیا پیدا کړي.
د سوداګرۍ او صنایع خونې مرستیال ښاغلي خان جان الکوزي د مالیې وزارت له رهبرۍ څخه مننه وکړه چې مالیه ورکوونکي ستایې. نوموړي منځنیو او کوچنیو مالیه ورکوونکو ته هم د ورته غونډو جوړولو غوښتنه وکړه.
د مالیې وزارت د عوایدو لوی رئیس او د سترو مالیه ورکوونکو رئیس هم د عوایدو راټولېدو او د نننۍ غونډې په اړه ګډونوالو ته هر اړخیز معلومات ورکړل.
د غونډې په پای کې د بېلابېلو سکټورونو اتو شرکتونو ( د افغان بي سیم مخابراتي شرکت، کام ایر هوایې شرکت، د افغانستان نړیوال بانک، د سلادین امنیتي شرکت، د الکوزي انټرنیشنل سوداګریز شرکت، د الکوزي غیر الکولي مشروباتو شرکت، د اتومتیف سرویس شرکت او د وینکو امتیاز ساختماني شرکت ) ته ستاینلیکونه او ایوارډونه ورکړل شول.
د یادونې وړ ده چې په دې غونډه کې د دولتي ادارو مرستیالانو او رئیسانو، د ملي شورا ښاغلو استازو، سفیرانو، د سترو شرکتونو مسؤلینو او د ملي تدارکاتو ادارې استازو ګډون کړې وو.